أول يوم أمي تشوفني مع واحده بنت:

** أول يوم أمي تشوفني مع واحده بنت:

1- المكان: المدرسة
2- الزمان: يوم الfun day كان مشمس و صافي و جميل.. "معظمه يعني"!!
3- المشهد: أنا واقف سبع رجاله في بعض في وسط المدرسه و معايا الجيرل فريند بتاعتي في مشهد إستعراضي مع أحاديث سريعه خاطفه مع الأصدقاء المعجبه بينا و الأستمتاع بأشعه الشمس الدافءه و نغمات الموسيقى المبهجه تحت السماء الصافيه ..
*
*
- فجأه!!!!!! أمي في وشي....!!!!

ماما: أزيك يا "محم...د" (مع الستريس على كل حرف من أسمي)!!

أنا (تقريباً في حاله من فقدان الوعي الجزءي): أزاي حضرتك يا ماما (ضحكه بنفسجيه)!!

ماما: و إيه بقه ميين الأموره دي؟؟؟!!!!

هي: صحبتوا يا طنت في المدرسه (مع ضحكه بريءه مشرقه بلهاء)

أنا "في سري": هاااار إسود!!! كان لازم تتسحبي من لسانك!! يا رب خدها !!!

ماما: صحبتوا!! .. ما شاء الله!!.. و ماما فين بقى يا حبيبتي؟؟؟

هي: ماما في البيت يا طنت (مع نفس الضحكه البلهاء)

ماما: أه.. لأ تمام.. سلميلي عليها أوي و يلا خدي بالك من نفسك وانتي مروحه (مع جز غير عادي على السنان كاد ان يصدر شرارات ناريه في وش البنت)!!

ماما: ها يا حبيبي اليوم حلو ؟؟ مبسوط يعني ؟؟؟

أنا: الحمد لله يا ماما اليوم كان مفيد أوي... (مع محاولة تفادي أي eye contact)!!!

ماما: مفيد أه..!! لأ ماشاء الله منا وخده بالي!! (مع نظرة إمتعاض لصاحبتي ثم النظر الى المطربه اللولبيه شيماء سعيد و هي بتتشألب على الstage)!!

ماما: طب إيه خلصت؟؟؟؟؟ ؟؟

أنا: لأ ناقص أصلي العصر بس و حروح على البيت على طول...!!