**** إنت مين معاك .. !!
*** ميعاد تقديم أوراقي للجيش المصري (تحيا مصر .. تحياااا مصر .. "شكراً شكراً .. إتفضلو أقعدوا") :
كأي شاب مصري ... واخد الختم المصري على كل حاجه في عيشته ...
إتكتب علينا إننا نتهان في عمرنا سنة لو إبن ناس أو تلاته لو رديت على أمك وحش في يوم كده وإنت راجع متأخر و هي كانت قاعده في أوضتها عامله نفسها نايمه أو على الكنبه في الصالون و هو مضلم .. و فجأه تسمع الصوت اللي كنت عايز تتفاداه ... فتطلع على السلم مخصوص عشان الأسانسير صوته ممكن يصحيها و تفتح و تقفل باب البيت ولا كأنك بتطفي مفعول قنبله زي نبيل الحلفاوي و هو رايح إيلات ... ضغط نفسي فظيع .. !!!
ماما (في عتمة الصالون) : محماااااااااااااااد ... تعالى .. !!!
أنا (تلبيش عام في كل أطراف جسمي .. بذات لما متكونش عارف فين مصدر الصوت .. و ياريتوا أي صوت!!) : نعم يا ماما في إيه خضتيني !!!
ماما "يا سوسو ستايل" :: تعالى تعالى .. ولع نور الصالون و تعلالي !!
أنا (في محاوله إنهاء فيلم إكسورسيزم ده بسرعه) : نعم يا ماما !! حضرتك ليه صاحيه لغاية دلوقتي أصلاً !!!؟
ماما: صاحيه عشان أطمن عليك .. !! ولا بترد على موبايلك ولا حتى بعتلي ماسچ واحده تطمني و إحنا بعد الفجر !! كنت فييين كل ده !!!!؟؟
أنا: في إيه يا ماما !!؟؟؟ هو أنا صغير !!!! خلاص أنا كبرت !!!
ماما: الكبير مش كبير بسنه .. الكبير كبير بإحترامه لنفسه و لأبوه و أمه !!!!!
أنا: في إيه يا ماما الكلام ده !!! كنت بتسحر مع صحابي و موبايلي قفل !!! عادي يعني !! أنا خلاص تعبت من الطريقه دي وأنا أصلاً مخنوق عندي تقديم جيش و قرف و مش لاقيين كمان ولا واسطه كويسه خالص لغاية دلوقتي عشان تخلصنا من الكابوس ده !!!! و حضرتك مش حاسه بحاجه !! و القصه كلها عند حضرتك جيت إمتى و نمت إمتى !!!!!
ماما (زي ظابط المباحث تبص كعب رجلي تعرف أنا مشيت قد إيه) : من يتقي الله يجعل له مخرجاً يا محمد !! رمضان قرب يخلص .. إلحق عشان ربنا هو الوحيد اللي لازم تستعين بيه و حظك حلو لإننا في أيام كريمه .. ربنا هو اللي حايخترلك الطريق اللي أنت تستاهله .. و ربنا يديك على قد عملك و نيتك ...>> نيتك ....>> نيتك ....." مش عارف ليه الكلمه دي الوحيده اللي عملت صدى صوت كده" !!!!
أنا (على راسي بطحه إعترفت على طول ذي المغفل): إنتي بتدعي علياااا ياااا مامااا !!!!! بتدعي عليا !!!!!!! بتقولي أخد على قد نيتي !!!!!! ليييه كده !!! ليه يا ماماااا !!!!!! خلي بقى ربنا يديني على قد نيتي و ساعتها شوفي حضرتك حتزعلي إزاي !!!!!
عشان ألحلق نفسي قبل ماشوف كيفيه عمل الجلاشه بعد إعترافاتي و تسريباتي اللي بسربها على نفسي دي ... أنا: ماما أنا داخل أنام !!!!!!!
***** و دخلت أوضتي ... سريري ... باصص للسقف ... و منمتش ... فكرت في كلام أمي ... كابوس .... مصيري المهبب وأنا بتضرب على قفايا الساعه خامسه الصبح وانا واقف في طابور الجيش... و قلت لنفسي خلاص مفيش مفر ...
و هو يعني أنا أفضل أهلس طووول رمضان و أجي على أخر كام يوم أرجع أقرب من ربنا بس عشان عندي مصلحه !!
مهو ربنا سبحانه و تعالى عارفني و عارف حعمل كده ليه و عشان إيه ...
و عارف أصلاً أنا بفكر في إيه كمان دلوقتي!!!
...
طب أسكت بقى خلاص و متفكرش ... كفيه فضايح ... حاسس إني حاكون منافق و أهبل أوي لو قررت إني ألتزم اليومين دول و خلاص ... ياعم أسكت بقى يالي في دماغي ... أنا عمال أتفضح أهو أهو بنتفضح خلاص ... و نيتي أكيد باينه .. أنا مش عايز غير الإعفه ... ربنا سامعني و شايفني .... طب أسكت بقى و كفايه ... نيه زفت ... فكر في أي حاجه تانيه طيب ... بيج تيستي من ماكدونالدز ... جميييل .... انت جعان .... لأ جعان ..... حتعرف أكتر مني بقولك انت جعان .... مفيش فايده ....!!!!!! مخي بيفكر على مزاجه و مش معبرني ...
و ماما مثلاً مش تقول يا رب أكتبله الإعفا .... لأ بتلبسني !!! ...بتقول على قد نيتي !!! ... طب و دي أظبطها إزاي .... طب أسأل الجوجل !!! جابلي حكم باولو كوهيلو و سحر و شعوذه و جحيم !!!! أنا ناقص !!!! ... أتحكم في نيتي إزااااي .... أعمل ريستارت منيين !!!!!؟؟؟؟ ... حد يشد كوبس نيتي يا جدعان ... !!!!!!!!
أيقنت أنه مفيش أمل ... مفضوح يعني مفضوح .. و حاخد على قد نيتي خلاص مفيش كلام ... اللي أنا مش عارف أخليها تحت طوعي يومين بس حتى فربنا يلاقيها كويسه فيديني على مقامها و قدها ... نيتي حتدمرلي مستقبلي يانااااس ... حتشطف بخرطوم برتقاني .. و أكل شوربة عدس و فول بزيت الكافور ... لاااااااء ... لااااااااااء ... منها لله نيتي .... إه منها لله !! .. طب إزاي ... ممممم ... طب ماهي نيتي دي أصلاً ربنا اللي خالقها ... ماهو مش أنا اللي جايبها لنفسي يعني .... خلاص أنا حسيبها فعلاً لربنا ... و أنا حتحكم في تصرفاتي و أخلص لله فيها ... ده اللي أقدر أعمله ... و نيتي دي بقه حسيبها للي خلقها ... لعلها تِتصلِح.... ياااه .. أنا طلعت فعلاً ولا حاجه ... حتة نيه مش عارف أظبطها يومين .... ضعييييف أوي أنا ... لأ حقيقي دعييييييف !!!!
*** كانت أواخر الشهر الفضيل ... و كنت خلاص حرصت على تعويض كل ما فاتني من قرأن و تراويح و تهجد و فجر ... و حرصت أوي على الدعاء ... الدعاء بحرقه ... الدعاء و أنا علي يقين بالإجابه ... حتحسها لو كنت فعلاً متأكد و مؤمن إن ربنا قادر و حيتقبل ... حتحسها أكيد ... إحساس لازم إنت تجربه مايتوصفش
...
أصل مفيش هزار ... دي فيها سنيين رايحه و أربعين يوم "ولكام بارتي" جحيييم ... و صحيان غصب عن أهلك من الفجر ... ولا بقى في نيتي ولا فخدتي !!!
**** و جاء اليوم المحتوم ... اليوم اللي كل واحد فينا فكر يخطف أخوه و يرميه وسط الدائري يواجه مصيره تحت عجلات الأخوه أصحاب المقطورات و الترلات !!!!!
إنه يوم الإرجا ... اليوم اللي الكل بيعيط فيه ... يا من الفرحه إن ربنا كتبلك الإعفاء أو من الجحيم اللي حاتشوفه .... يوم إعلان هل أنت من ولاد المحظوظه أم من ولاد الموكوسه !!
رحت أصلي الفجر يوميها في جامع بلال ... و ألاقي إيه بقى ... ما شاء الله الشباب مرشق في كل حته .. الفجر ولا كأنه صلاة جمعه !!!!
المهم ... إتجهت لإواجه مصيري ... الشمس بدأت تطلع ... زحام غير عادي ... تيجي نسمة هواء تعدي من على وشك مشبعه بميكس من روائح العرق المختلفه .... حجزت مكان سبيشيال أوي على الأسفلت عشان أنملي ساعتين تلاته كده عشان أصحى فايق بقه و أقدر أقعد الخمس ست ساعات لغاية مايقرروا يطلعوا يقوله النتيجه !!
أنت هناك عباره عن رقم و تاريخ ميلاد زيك زي أي علبة "لا فاچ كيري" في السوبر ماركت ....!!!!
و بداء "الكاونت داون" ... الراجل طلع على المنصه ... وشه بدر منور ...فرحه و بهجه و قوز قزح مرسوم وراه و هو بينادي على التواريخ اللي حتخش الجيش ...#الجلاشه_وينز !!!!
... و كانت المفاجاءه ........... !!!!
الظابط (شبه الخليل كوميدي كده): هههه شهر يناير هههه كله يجي يقفلي طابور هنا داخلين كلوكوا يا حماده منك ليه هههه ... فبراير .... مممممم ... لييييه .... ماشي إعفاء يا ولاد ال ولا بلاش ماشي هههه ... نيجي بقى لإخواتكو بتوع مارس هههه ... يلا يلا هههه وراهم ياخويا منك ليه ههههه ...
إبريل ... و ساد الصمت للحظات مرت عليا و كأنها سنين !
أنا و صراعي الداخلي ---->>> هااااااا .... أيوا أنا إبريل ..... قووول ..... لأء ملتقولش !!!!! ..... طب خلاص قوووول بسرعه .... حسد وداني .... عايز أعمل بيبي حنفجر ..... يا رب .... أنا داعيت ربنا كتير و كنت مخلص ... أيوا ...الحمد لله كنت مخلص ..... متقوووول يا عم ... أنا واثق في الإجابه من ربنا إن شاء الله .... قووول قووووول مأنت ظابط مالكش عازه أصلاً ... !!!!!!
الظابط (في أخر كلمات سمعتها في هذا اليوم): شهر إبريل ... هههه ... يلا يا دفعه منك ليه ورا إخواتكوا بتوع شهر يناير و مارس هههههه !!!!!!!!!!!
**** كانت .... صدمه بكل المعاني ... كسرة نفس حقيقيه ... حزن شديد ... خبطه في راسي نسيتني أصلاً حوار الجيش ده كله اللي أصبح صغير أوي جنب فكرة إن ربنا لم يتقبل دعائي أصلاً ... مع إني كنت واثق جداً جداً من الإجابه
...
أنا كنت فاهم غلط ولا إيه !!! ربي لم يتقبلني !!!! فقط تذكرت كلمات أمي ... على قد نيتي أخدت !! ... طب إزاي مع إني ظبت كل حاجه .... صدمه ... !!!
خلص اليوم و قررت إني قبل ماروح البيت حاروح الجامع ... روحت ... و صليت ... و سجدت ... كان حزني لا يوصف
...
يا رب هل كنت أنا أنافق نفسي بالعباده في سبيل هدف معين ... و لو متحققش حتقلب على العباده و أرجع زي ماكنت ... و عشان كده يا رب لم تقبلني !!!
لأ يا رب خلاص ... أنا مش حرجع زي ماكنت ... و مش جايز هو ده الخير !!!! ... أيوه أكيد هو الخير ....!!! الحمد لله يا رب أنا راضي باللي كتبتهولي .. يا رب سامحني على ضعف علمي و معرفتي و على قلة حكمتي !!!
***** المهم .... في نفس الوقت .... أبويا رجع مصر عشان يكون معايا في اليومين المهبيبين دول ... يظبط كام أنكل كده يخلصونا من الكابوس ده .... يعني على الأقل أخذ سنه و خلاص مش ثلاث سنين ... كتير أوي ... بس برضه أنا راضي على أي حاجه .... أكيد ربنا كاتبلي الخير و أحسن حاجه !!!
المهم واحد صاحب أبويا طلع حبيبه رئيس الكومسيون الطبي... مش عارف ليه مكنتش مبسوط و متحمس ... كان لايزال بداخلي القليل من بقايا مرارة إحساس عدم قبول ربي لدعوتي ...
فقلت لأبويا أنا مش عايز واسطه خلاص ... ربنا هو وسطتي ... و أنا متأكد مليون في الميه إننا لو كلمنا مييين برضه حيحصل اللي ربنا كتبهولي .. فأنا حدعي ربنا يكتبلي الخير و بس مهما كان اللي مكتوبلي ده إيه ...
فأتكلم معايا أبويا على فكرة الأخد بالأسباب و لعله سبب يريحني شويه و تبقى سنه و خلاص ... !!!
رحت مع أبي عشان أرضيه و مايزعلش مني و قابلنا صاحب أبويا و ذهبنا للرتبه الكبيره ده .... (شكله لواء تقريباً .. كان حاطت سيفين كده على كتافه) ... المهم ... صاحب أبويا كان جايب معاه للراجل هديه في كيس كده عشان يلين المسائل و كده ...!!!!
ممر طويل ... عساكر و ظباط كتير عدينا عليهم عشان نوصله .... مكتب كبييييير ... عليه شنب أكبر .... كرش متعزز كده راسي و مليان .... هيبه جامده مش هزار ... !!!
شاف كيس الهديه ... فجأه تحول لطفل صغير حايموت من الفرحه بلعبة الچي أي چو الجديده اللي باباه جبهاله ...!!!!
فتح الكيس بسرعه و عينه كلها سعاده ... فرشات بطير من حواليه ... و أنا حموت و أعرف الكيس في إيه برضه ...!! المهم ... بدأ يطلع الهديه ... و كانت الهديه صادمه بالنسبالي !!!!!
طلعت إيه بقى ....... عدد واحد ترينينج بومه رمادي عليه علامه بومه كبيره أوي من الضهر كده و من غير جيوب حتى ... و عدد إثنين شراب ماركة أكتيڤ أبيض ...!!!!!!!!!!!!!!!!
أنا قلت خلاص !!! أنا حدخل الجيش أنا و أبويا سبعتاشر سنه على الهبل اللي الراجل طلعه من الكيس ده !!!!!!
و لكن ... الراجل كان طاير بالترينينج و لا كأن عروسه طايره بفستان فرحها !!!!
الظابط: إيه يا حسن بيه الترينجات الجميله دي ... !!!!!!!
أنكل حسن: يا باشا إحنا تحت الأمر ...!
المهم بعد شوية كلام حمصي كده الراجل قالنا متقلقوش أنا في كشف الهيئه حقول إنه ماينفعش ظابط .. و بكده تمام ...
طبعاً كلمات شكر متناثره في الجو ... و لكني مازال بداخلي إحساس إن ولا هو أو غيره في إيده حاجه .. و إني عادي جداً ممكن أي حاجه تحصل فادخل ثلاث سنين برضه ولا حيعرف يعمل حاجه لو لم يشاء ربي.... !!!!
دخلت كشف الهيئه ... طبعاً كله حواليه بيؤدي دور المكسح أو اللي بقه معوج ...اللي لسانه تقيل ..شوية تهتهه ... واحد جنبي كان عامل نفسه مش سامع...؛
- كل لما الظابط ينده عليه الواد يعمل مش سامع و يرد يقوله: إيه ..!؟؟
- الظابط ينده مره كمان و التاني زي الغبي يقوله إيه مش سامعك يا باشا .. !؟؟
- قام وقف الظابط من مكانه و قاله و نظرة الجحيم في عينه: إنت يابني شايفني ولا مش شايفني ؟؟ الواد قاله أه يا باشا شايفك ليه ؟؟؟ قاله أومال عامل مش سامعني ليه يابن الكلب !!!!؟؟ :)))))))) ...
المهم ... الشرابين الأكتيڤ عملوا شغل و أخدت سنه بدل تلاته خلاص الحمد لله ... بس كان المفروض بعديها أكمل إعادة الكشف الطبي بتاعي ...
الأصل بقى في الكشف الطبي في الجيش إنه يثبتلك إنك كداب و مفكش حاجه ... نظرك لازم يكون نيجاتيڤ سبعين مثلاً أو داخل عليهم و شايل رجلك في كيس دليل إنك مبتمشيش في الحالات دي بس ممكن ساعتها تطلع و تاخد إعفا ... !
أنا بقى متنيل بستين نيله رياضي .. نظري سته على سته زفت شارب.. اليوم ده الوحيد اللي بتحس إن الحاجات دي مش نعم خالص من ربنا و بتبص بقه للي جنبك اللي إبن المحظوظه اللي مش شايف ولابس نضاره بنظرة حرمان فظيعه كده ... يارتني كنت أنا يا أخي ... صحيح !!!!!!!!!!!!!!!!
المهم ...... اللي حصل بقى ... وأنا واقف بكشف باطنه ... الدكتور قالي حاجه غريبه أوي مافهيمتهاش و ماكنتش خلاص ناقص أي صدمات تانيه كفايه السنه إللي لبستها.... !!!
الدكتور: يابني إنت شاكلك كده "class three" .... !!!!!!!!!
أنا (سكت كده و مش فاهم) أصل مش ناقصه هيه ....!!!!! : يا دكتور كلاس ثري إزاي !!!؟؟ أنا تمام و زي الفل !!!! ؟؟؟
الدكتور: يابني باين عليك ... خدو يا أحمد يكشف هناك عند الدكتور ياسر !!!!!!!!!!!!!!!!
- أنا (في جحيم بيني و بين نفسي) : لاااااااء أنتو عايزين مني إيه !!!!! لااااااء أنا راجل كلاس وان و حفضل كلاس وان طووول عمري كلاس ثري إيه!!!!!
**** أخدني الدفعه وأنا ماشي معاه برسم في مخي كل سيناريوهات الدفاع عن النفس و الشرف ماسك في التيشيرت و البنطلون بتوعي بكل قوتي .... !!!!
شافني دكتور ياسر ... في أقل من دقيقه ... بصلي كده ...
قالي(و نظرة حزن كده على وشه): أنت يبني كلاس ثري .. حتاخد إعفاء !!!!!!!!!
أنا (في رعب ولا فرقت معايا كلمة إعفا دي خالص) : لاااااااء لييييه كده ...... يا دكتور أبوووس إيدك بتقول كده على أساس إيه ..... أكشف عليا طيب إنت مكشفتش أصلاً ... !!!!!
الدكتور(بإستغراب شديد): يابني وانت مالك خايف ليه مافيهاش حاجه في زيك كتير يعني عادي !!!!!!
أنا (قلبي حيقف خلاص): يا دكتور لااااااااء أنا عارف نفسي أنا زي الفل !!! أنا مش زي حد !!!!!!
الدكتور(بعصبيه): ماهي سنانك باينه أهه يابني ... كلاس ثري مش محتاجه كشف !!!!
أنا "(و حاله من الذهول الشديده من بتوع أحمد شفيق)" : إيه !!!!! سناني !!!!!
الدكتور: أه يا سيدي يلا خلصنا ... روح مش عارف مكتب مين عشان تاخد الشهاده ...... !!!!!!!!!
.... و أخدت إعفه من الجيش عشان فكي اللي فوق مش بيقفل بظبط على اللي تحت ..... !!!!!!!!!!!!!
أنا لو كنت قلت السبب ده للناس اللي واقفه مستانيه دورها اللي أصلاً في منهم اللي جايب شهادات و تحاليل إنه مات قبل كده أربع مرات كانه ممكن دماغهم تخف و يغنوا الملاحه عادي جداً أو لسانهم يقف و يتشلوا زي نور الشريف بعد ماغير الإنترلوب في مخه عشان يخلف ... !
عمر ماحد صدق السبب ده حتى أهلي غير لما شافوا الورق بنفسهم ... أخدت الإعفا إللي كنا طول الوقت ساعتها بنقول دي عايزه على الأقل واصته من وزير عشان تاخدها .... و كأن رسالة ربي سبحانه و تعالى لي ... كان ليك مين ممكن تتوكل عليه و تستعين بيه غيري ؟؟؟
من المهيمن المٌسيطر على الأمور كلها؟؟؟ من القادر على أي شئ ؟؟ من مالك هذا الملك ؟؟
كإنه إمتحان من ربنا ... هل كنت حتثبت ؟؟ هل حتحمد ربنا و ترضى للي حايتكتبلك مهما كان؟؟
ولا حتعترض و تتقلب على عاقبتك لو متحققش اللي إنت عايزه؟؟؟
هل ستحسن الظن في لله ؟؟؟
هل فعلاً إنت واثق و مؤمن إنك لو داعيت ربنا و إنت واثق في الإجابه إن ربنا فعلاً حيتقبل و إن ربنا قادر على الأمر ده ؟؟
طب لو متحققش اللي إنت داعيت بيه و عايزه من ربنا .. هل حتعتبر ده شر و جالك ؟؟؟
*** {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
*** {فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا}
** ((أنا عند ظن عبدي بي فليظن بي ما يشاء))
أكتب هذه القصه فقط لتذكره نفسي كم كان ربي كريماً معي تفضلاً لهذا الشهر الكريم ... و كم إني إنسان بكل معاني هذا الوصف .. أتذكر العتاب الرباني الرقيق و أحزن على تقصيري ... {و هل جزاء الإحسان إلا الإحسان} ... !
#إلحق_رمضان_لسه_تقدر_تعمل_كتير
#إثبت_على_دعوتك
#معاك_مين
#ذكرياتي_مع_أمي
This is one of my absolute favourites . I simply love it :)
ReplyDelete