قبضة الهلالي

           أبويا: إيه يبني حكاية القصص اللي بتكتبها مع أمك دي !!!؟

أنا: عادي يا داد قلت أفتكر شوية القصص اللي حصلت زمان مع ماما و أكتبها ..

أبويا: ممممم .. و أبوك اللي تعب معاك مش فاكرلو أي حاجه !!!!؟ دنتا أول واحد في مصر جالو جيم بوي يا ع** !!!!

أنا: طبعاً يا داد حضرتك حبيبي .. خلاص أنا مش حكتب على ماما تاني ..

أبويا: أنا أبقى قاعد مع أنكلك أحمد و ألاقي الواد إبنو التنح أبو كرش يقولي إيه يا أنكل هو مو...دي مش بيكتب عليك خالص ليه !!!

أنا: خلاص يا داد أنا مش حكتب تاني غير على حضرتك ..

أبويا (مكشر و هو بيحاول يداري إبتسامة رضا و سعاده كده): عادي زي منتا عايز !!

طيب .. يلا نبداء القصه .. ماشي .. أبويا يعني الشياكه .. يعني الأناقه .. يعني أحلى برفنات .. يعني الكرم .. هه .. يعني القعده الحلوه .. يعني الحب كلووو .. واخد بالك .. هو الي مأكلنا و طبعاً هو اللي مدلعنا .. و في هذه المناسبه أحب أهدي لأبويا أغنيه شاديه بعد الريمكس (سيد الرجاااااااااااله يا حبيبنا .. يا حبيبنا .. و حاااابيبناااااااا)

.. لأ أنا كده عمرو بجد !!

*** قبضة الهلالي:

كانت أمي لو مش حتلحق تيجي معايا الماتش كان أبويا هو اللي بيقوم بالمهمه دي .. فكان يوم الماتش ميروحش الشغل ..

كان أبي يصحى من بدري .. ياخد الدش التمام .. يلبس هدوم الخروج .. يخلص إزازة برفان .. لدرجه إني بشمها وانا نايم .. أعتقد إن أبويا كان بيحب البرفانات أكتر من الزمالك !! أه زمالك حد ليه شوق في حاجه !!!!!؟؟؟؟؟؟؟
..
المهم .. يحضرلي الفطار و الامؤخذه الiso star اللي بعصير البرتقان "حاجه زي محلول جفاف من غير فزلكه أهو" .. و يكوي الt shirt و الشورت اللي حلعب بيهوم.. بس .. و يبداء ينادي عليا كأني بلعب كوره قدامه ..

أبويا (الساعه 8):محمااااد .. محماااااااد .. محمد .. محماااااااااد ... يلا يا محمد قوم

أنا: لسه بدري يا داد .. الماتش الساعه 3 !!!

أبويا: ونتا ناوي تقوم قبليها بساعه !!! هو أنت رايح سينما !!!!!! يلا قوووم .. قووم يا محماااد قووم !!!

أنا :ععععععحححاضر ...

** كان يوماً ممطراً ملئ بالرياح و الأتربه و الرعد و البرق و الأعاصير و ال .. إيه الأڤوره دي !!!!

كنت حلاعب يوميها مدرب مكنش جامد خالص وانا من كتر منا عارف إني حكسب كنت بفكر إني عايز أخلص بدري علشان أروح مع أصحابي فيلم بليه و دماغه العاليه للصاروخ الكوميديا الجديد محمد هنيدي في السينما (عَجِزنا أوي) المهم..!!!!

رحت كالعاده قبل الماتش بساعتين علشان نتغدى و ألحق لمؤخذه أهضم ..

خلصت كل تعليمات أبويا (أكلت "مكرونه بيضه مسلوقه من غير صوص و فراخ مشويه و أي عصير بس مش منجه علشان مهبطش !! و سخنت و صليت و غسلت وشي و دماغي بميه ساقعه مع سقوط بعض قطرات الميه الساقعه على ضهري إلى أسفل ضهري مروراً بالغاليه .. تصيبني بالقشعريره مع إنتاج كمية أدرينالين في جسمي لا بأس بها !!)

المهم .. كان المدرب اللي حلعبوا بيسخن و هو أصلاً مدرب و شغال في النادي من و هو صغير و إبن النادي يعني ..

شفت واحد صاحبي من العيال البيضه اللي شعرها أصفر السيس السيكي ميكي بتوع دادي و مامي اللي بتلعب تنس و تشرب iso star دي !! المهم قعدنا بالصدفه قدام الملعب اللي الواد بيسخن فيه نتكلم و نضحك عادي ..بس تقريباً الراجل فهم إننا قاعدين بنتكلم و نتريق عليه فكان هذا هو السبب في باقي أحداث اليوم المؤلمه.. أوي ..!!

الحكم العام (في الميكريفون): على ملعب رقم تلاته محمد حسام و مش فاكر إسموا بصراحه!!

أتجهت على الملعب و أنا مبتهج و مبسوط .. واثق الخطى .. مفرود المنكبين .. ماسك لامؤخذه موزتي و عصيري باكل و بشرب و إيه .. بيه رايح يلعب ..!!

وصلت الملعب .. قوووم إيييه !!!!؟؟؟؟ أتفاجئ كإني داخل ملعب ولا كإني حلعب مع الترجي في تونس ولا أشانتي كوتوكو في غانا !!!!!!! الملعب متحوط بكمية عيال بتوع للم الكور ball boys و مدربين و ناس و منظر عمري مشوفتو !! الملعب ولا ملعب كوره .. الناس من كتر مكانت كرهاني كانو بيشجعو ضدي لما كنت أضيع كوره في التسخين !!!!!

المهم مكنش واقف بره غير أبويا .. الراجل إللي للأسف محترم زياده أوي عن اللزوم و ذوق و متربي بزياده اللي عمري في حياتي ماشوفتو حتي بيتكلم بصوت عالي مع حد .. صاحب أشهر كلمه في التاريخ ("إحنا رجاله متربين و لازم نعامل الناس بأخلاقنا مش بأخلاقهم!!!)

عمري ماكنت بلجأ لأبويا في المشاكل لإني عارف حيقولي إيه!!

نرجع للملعب .. أبويا قاعد بالسيجاره على كرسي في هدوء و سكون تام و ساعات صاحبي كان يجي يقف .. أصلو الواد كان إيه بقى .. بيحب بت كده من إسكندريه .. بت جمال و دلال و حلاوه و حاجه فخر الصناعه السكندريه !! فطبعاً البوبّي واقف على الماتش بتاعها ولا حسن شحاته في نهاءي أفريكيا ..!! .. الواد برضو بصراحه كان واد بورم أوي و فورمه و على طوول بيحكيلي على خناقاته و نزاواته و شقاوته .. بصراحه ساعات كتير كان بيبقى نفسي أبقى زيه ..

المهم يا حبايب ..شوفت أنا المنظر و الأجواء دي بدأت أقلق ..و الواد إيه .. نازل قتيل ولا حتى سلم عليا ...!!

بدأ الماتش ...

الحكم: فيرست جيم .. فيرست ست .. محمد حسام تو سيرڤ...

أنا (متحفزاً): طراااخ ...
الحكم (ببرود): fault
الجماهير: هييييييييييييييييييه .. أيوا بقى !!!! يلاااا .. إديلووووووووووو .. الله أكبر !!!!!!!!!

الحكم (ببرود برضه): silence please
أنا بصتلو كده و نفسي أقولو: سايلنس إيه يا عم الرايس دا أكتر واحد متعلم فيهم بيقول عايز عزيير أورانچ زاءع !!

المهم .. أنا السيرڤ التاني: طراخ
الحكم: double fault

الجماهير: هوباااااااااااا .. يابن اللعيبه ... إيييه الحلاوه ديييييييي .. إيدي إيدييلووووو !!!!

كانت زيطه و أجواء لم أتوقعها و لم أراها و لم أشهدها حتى من قبل .. كنت بحاول أدور على صاحبي ده مابين الناس .. بُرَم برضو و فورمه و ممكن يعمل أي منظر في الحفله اللي عليا دي .. مكنتش بلاقي غير أبويا .. بنفس الهدوء و السيجاره و نضاره الشمس ..

فقدت تركيزي تماماً .. و بداءت المباراه تتسحب مني .. و إزداد الضغط .. و الزيطه و الزمبليطه .. و أنا في إنهيار و خساره مستمره ..

حتى سمعت وانا واقف لسه حلعب سيرڤ واحد من العيال اللي وارايا بيقول : أومال بيقولو لعيب و بتاع ..يا عم ده عامل زي الوليه الحامل هاؤوووأوووووووأااااااااااااااووووووو !!!!

و كانت القشه التي قسمت ظهر البعير ....

لفيت و بعزم قوتي و مسكت الكوره اللي في إيدي و بمضربي قومت شايطها طراااااااااااااااخ !!!!!!!! في دماغه !!!

الملعب إتقلب لمولد سيدي المضروب .. كل العيال و الناس اللي كانوا حوالين الملعب نزلوا يؤدوا فريضه الضرب و التلطيش .. تحول أرض الملعب لقطعه من جهنم .. قطعه من الأرض لا يدخلها سوى أصحاب القلوب الميته .. زومبيز .. فاقيدي الإنسانيه .. +18 .. للكبار فقط .. من كتر مازهقوا في الضرب فيا و في ناس تانيه معرفوش يعملوا الواجب بسبب الزحمه حواليا .. مسكوا مضربي و كسروه !!!! حتى الiso star بتاعي مرحموش !! كانوا فاكرينه عزير أورانج أكيد ..!

كنت محتاج على الأقل مازينچر و معاه أفروديت إللي حتضرِب برضو في الأول بعد متضرَب لامؤخذه سلاحها الوحيد اللي عمروا ماجاب نتيجه مع إني متأكد إنها لو طلت بس بالبينك اللي بتلبسوا ده على العيال دي كانو حيتحرشوا بيها و يكسروا عينين مازنچر أكيد !!

المهم أنا حسيت إن اليوم مش حايخلص .. غير لما كل واحد ياخد قطعه تذكار من جسمي ..

في وسط الزحمه و الضرب و الشتايم و الضلمه اللي أنا كنت فيها في عز الشمس .. لاقيت إيد بتشدني بقوه فظيعه .. قولت بيني و بين نفسي بس كده خلاص همه عايزين ياخدوني take away .. كنت حصرخ و أقول حرااااااام بقه إنتو مالكوش إخوات صبيان خالص !!!!!!!

المهم اللي كان بيشدني كان مُصّر بصوره فظيعه إنو يطلعني .. كان متشبث فيا و بيطلعني مابين الناس بقوه فظيعه قلت يا رب يطلع صاحبي الفورمه اللي نفسي أكون زيه هو اللي بيشدني ..

و لكن .. شممت راءحه مألوفه .. راءحه أعرفها جيداً .. راءحه في أنفي منذ نعومه أظافري .. كانت راءحة برفان أبي .. !!!!!!!!!!
الذي تحول فجأه الى إبراهيم الأبيض .. چيت لي .. چاك نورس "نجم زمن الأكشن الجميل" .. !!

لم أراه قط على هذه الحاله .. كان بيشدني بإيد و بيضرب بالتانيه .. حتى طلعني من وسطهم و هو مثبت كل الناس اللي كانت حواليه ..
ظللت أنظر إليه و أنا لا أصدق ما فعله أبي .. تحول فجأه الى رجل المستحيل ..007 ..!!!

فكان درساً قاسياً لي .. الرجوله فعلاً أدب و أخلاق و أحترام .. و إن الراجل هو اللي بيتحكم في نفسه مش البُرم اللي فاتح صدره .. نعم أبي أنت كنت و ستظل مثال الرجل الذي أتمنى أن أكون مثله .. الچينتل مان !!

صاحبي البُرم إكتفى بالمشاهده .. بعضلاته .. ببلطجته اللي في القصص بس مع لهطة القشطه صاحبته إبن المحظوظه !!!!!